شرح تغيير زيت فتيس سياره دايولانوس المانيوال بالصور

قبل ما ابدأ فى موضوعى عايز اسأل سؤال مهم واحترت فى اجابته

مين العبقرى صاحب افتكاسة ان زيت الفتيس المانيوال مبيتغيرش ولاكن يتزود بس ؟

لو حد يعرف يقولى ضرورى

زيت الفتيس عباره عن زيت مخصوص للتروس له خواص يفقدها مع مدة الأستخدام وايضاٌ طريقة الأستخدام وحتى لو العربيه مرفوعه فله مثل اى شئ آخر عمر افتراضى بعده يفسد ولا يستطيع تأدية وظائفه على اكمل وجه

لذلك فمن الطبيعى ان يتم تغييره على فترات تطول او تقصر تبعاٌ لطريقة القياده ( عنيفه او هادئه ) وايضاٌ عمر التشغيل

وطبعاٌ الحفاظ على مواعيد تغييره تطيل عمر الفتيس وايضاٌ تحسن مستوى استجابته ( سهولة التعشيق فى النقلات وهدوء صوت الفتيس )

ولأن الموضوع هام جداٌ وحيوى جداٌ وعليه اختلآف فى الرأى حبيت اعرضه بصوره واضحه حتى يستفيد الجميع

واكيد لما نشوف شكل الزيت اللى نازل من الفتيس وشكل الزيت الجديد والتغيير الكبير لأداء الفتيس قبل وبعد التغيير

هنقدر نرد كويس على اى حد يقول ان زيت الفتيس مبيتغيرش

وعلى فكره الموضوع مش مكلف خالص

نخش بقى على الجد

المكونات

هنحتاج علبتين زيت فتيس موبيل درجة لزوجته 90 الواحده ب 19 جنيه

هنحتاج جوان كرتيرة فتيس لانوس مانيوال ب 10 ( ممكن متحتجهاش لو طلعت القديم سليم )

1 لتر بنزين 92 لزوم الغسيل والتطهير ب 185 قرش

يعنى اجمالاٌ 50 جنيه بس

وطبعاٌ هنشتغل بأدينا من اجل توفير اجرة الصنايعى هههههههههه

دى صورة زيت الفتيس



هنسمى الله ونبدأ

هنرفع العربيه بطريقه مناسبه وعلى ارضيه مستويه علشان نقدر نشتغل تحتها ( لو فى مجرة تغيير زيت تبقى تمام اوى )

هنجيب لقمه او مفتاح 13 ونبدأ نفك العشر مسامير بتوع كارتيرة الفتيس

ملحوظه

( اللانوس من ضمن قله من العربيات التى لا توجد بها طبه لتغيير زيت الفتيس ولازم نفك الكارتيره بتاعت الفتيس علشان نفضى الزيت القديم )

الطبه اللى موجوده فى جانب الفتيس دى بتاعة قياس مستوى الزيت بداخل الفتيس فقط ولا تنفع فى سحب الزيت القديم او إضافة زيت جديد

هنخلى بالنا ونبقى حاطين حوض كبير لتجميع الزيت اللى نازل من الكارتيره

هنهوى المسامير شويه بشويه وندى فرصه للزيت ينزل فى الحوض

زى كده



لحد ما يخلص خالص وبعدين ننزل الكارتيره



هنبص على الفتيس بعد ما حلينا الكارتيره وسبناه لما صفى زيته كويس هنشوف تروس الفتيس قدامنا كده




هنبص على الزيت اللى نازل هنلاقى لونه اسود هباب وريحته محروقه ومليان رواسب وبرادة حديد ناتج عن تأكل التروس اثناء التشغيل



هنكب الزيت فى مكان آمن بعيد عن المياه الجاريه و الصرف الصحى وبعيد عن الزرع لأنه سام

هنبص للرواسب الباقيه فى آخر حوض التجميع هنلاقى بلاوى



هنفك مسمار ظبط معيار الزيت من جانب الفتيس

المسمار ده بداخله مغناطيس هنلاقيه لامم برادة حديد كتير اوى هننضفه ونغسله كويس وبعدين نربطه تانى

وده شكله




هنغسل الكارتيره بالبنزين ونشفها كويس لحد ما تبقى بالشكل ده



هنغسل العشر مسامير كويس بالبنزين وننشفهم كده




هنبص على الجوان لو طلعناه سليم وحالته جيده هنركبه تانى كما كان

ونقفل الكارتيره كما كانت ونتأكد من الرباط كويس ونقفل المسامير ونحرق على رباطها تباعاٌ وبطريقة الكروسات ( اقصى اليمين ثم اقصى الشمال )

هنطلع بقى من تحت العربيه

ونفتح الكبوت

ونبص على طبة ملو الزيت الجديد ودى مكانه تحت البطاريه من ناحية صدر العربيه وفوق عقربة النقل بالظبط



هنلاقى غطاها اسود بلاستيك هنفكه وبعدين لقمه 17 و نركب دراع تطويل ونفك الطبه ونطلعها بره ونغسلها بالبنزين



هنبتكر قمع طويل ورفيع لملو الزيت الجديد

وده فكرته بسيطه اوى

هنجيب جلاده بلاستيك بتاعة اى كشكول كبير



وهنلفها على هيئة قرطاس ونلفه بالشيكرتون علشان يبقى جامد وميفكش



هندخله مكان الطبه اللى فكيناها ونبداء فى ملو الزيت الجديد




حد شاف الزيت الجديد لونه ايه ؟



طب فاكرين لون القديم ؟



اكيد الفرق واضح !

طيب هنحط زيت قد ايه ؟

هنفضى زجاجه على الآخر

والتانيه هنلاقيها مدرجه من الجانب هنصبها بس هنسيب فيها 200 مللى

يبقى مجموع الزيت المضاف 1800 مللى

ودى قيمة ملو الفتيس المانيوال


هنركب الطبه تانى ونربطها كويس ومننساش نركبلها غطاها البلاستيك مانع الأتربه

كده خلاص

ايوه خلاص بس زيادة تاكيد هنفك طبة المعيار اللى فى جانب الفتيس من تحت ونبص على مستوى الزيت فيها لازم تكون بتسيل زيت بس بسيط يعنى متكبش كتير وبرده متبقاش مانعه زيت

نربطها تانى


وبكده الف هنا وشفى

هندور العربيه ونجرب الفتيس

واستمتع


حد اقتنع بفكرة تغيير زيت الفتيس ولا لسه هنزوده بس ؟

طيب

حد عجبه الموضوع ؟

ولا طلع اى كلام !

طيب لو بالفرض عجبك الموضوع

ادعولى ربنا

يشفى زوجته ويسدد عنه دينه

اللهم آمين


صاحب الموضوع

عصام ابو الفوارس جزاه الله خيرا

شارك الموضوع

مواضيع ذات صلة

6 التعليقات

التعليقات
6 يوليو 2015 في 6:13 م حذف

مكان طابة قياس مستوى الزيت فين فى الفتيس .. ممكن صورة لمكانها

رد
avatar
26 أكتوبر 2015 في 11:50 ص حذف

والله انت انسان قمة الاحترام

رد
avatar
26 أكتوبر 2015 في 11:57 ص حذف

نسيت ادعيلك ان ربنا يسدد كل دينك ويتم شفاء زوجتك ويبعد عنكم كل مكروه .........اللهم امين

رد
avatar
14 أبريل 2016 في 5:04 ص حذف

ربنا يكرمك ويهديك ويذهب عنك وعن زوجتك الحزن والهم والضيق والكرب ويكون ده سبب فى دخولكم الفرودس الاعلى من الجنة يارب

رد
avatar
9 مايو 2016 في 12:59 ص حذف

طيب انا حصل معايا حاجة مختلفى تمام انا كنت بغير شورت بلوك وطبعا الكبالن اتفكت وفى زيت من الفتيس نزل شوية كان نازل اسود طين وبعد ما ركبت الشورت بلوك بسأل الميكانيكى وبقوله عاوز اغير زيت الفتيس قالي مش بيتغير دة بيتزود بس وجبت زجاجة كيلو من موبيل وحطها كلها واستلمت العربية بس في صوت وانا ماشى زى صوت الكرونة بتاعت العربيات القديمة فرجعتله تانى بقوله ايه الصوت دة قالى دى بلية الفتيس الداخلية ومش بتتغير والصح فتيس استيراد مع العلم ان الصوت دة ماكنش موجود قبل كدة اشمعنا مع تغير الشورت بلوك وتزويد الزيت فجأة البيلة دى باظط فنفسى حد يفيدنى فعلا كلامه صح ولا ايه؟؟؟

رد
avatar

إجمالي مرات مشاهدة الصفحة